泰式鹽焗鳥頭

多謝大家贊賞，其實同我哋粤菜離唔開生粉豉油糖一樣，泰國菜來來去去亦係用香茅，南薑，青檸個幾種香料！呢個泰式鹽焗鳥頭做法超簡單。首先，買條元朗黃油烏頭，大細隨自己鍾意，大埔墟街巿細條20，大條就25蚊，好抵食！魚劏好(不用打鱗)，用廚房紙索乾水，尤其魚肚内d血水一定要索得夠乾淨，否則會有腥味，魚肚内的黃油亦要取出洗乾淨待用，然後拍下香茅出味，斜切成絲，南薑4~5片切粒(如果冇亦可以用中國薑代替)，蒜頭幾粒拍下切茸，指天椒一條切粒，唔食得辣就唔使落，檸檬葉一片搓下出味切幼絲，以上材料撈匀舂下出香味後加魚露，白醋同酒各一茶匙調味，塞入魚肚内，不要塞太實留少少空間俾熱氣可流通，雞蛋一隻，只要蛋白，拂匀，輕輕搽匀魚身，跟手舖上粗鹽同埋之前取出的魚油，有蛋白d粗鹽就好易黐住條魚喇，焗爐預熱220，焗盤先舖張錫紙，放一層粗鹽係底，再擺上條魚，魚面要用粗鹽全部蓋過，焗20分鐘至魚全熟即可(視乎條魚大細自己調較)，攤凍少少用刀背輕輕敲開粗鹽剥皮就食得了。

汁醬方面，我用咗魚露，椰糖，青檸擠汁，刨皮切絲，泰式酸辣雞醬，指天椒半條切碎，白醋少許，甜酸度同辣度可因應各人口味自行調較，無份量㗎！完全冇難度，大家都不妨試下做啦！晚安喇~😴😴